1,956
עריכות
שינויים
קפיצה לניווט
קפיצה לחיפוש
שורה 447:
שורה 447: + + + + + + + + + + + + + + + + + + + + + + + + + + + + + + + + + + + + + + + + + + + + + + +
←יחזקאל
==יחזקאל==
==יחזקאל==
===פרק לו===
(א) ואתה בן אדם הנבא אל הרי ישראל ואמרת הרי ישראל שמעו דבר ה':
(ב) כה אמר אדני ה' יען אמר האויב עליכם האח ובמות עולם למורשה היתה לנו:
(ג) לכן הנבא ואמרת כה אמר אדני ה' יען ביען שמות ושאף אתכם מסביב להיותכם מורשה לשארית הגוים ותעלו על שפת לשון ודבת עם:
(ד) לכן הרי ישראל שמעו דבר אדני ה' כה אמר אדני ה' להרים ולגבעות לאפיקים ולגאיות ולחרבות השממות ולערים הנעזבות אשר היו לבז וללעג לשארית הגוים אשר מסביב: ס
(ה) לכן כה אמר אדני ה' אם לא באש קנאתי דברתי על שארית הגוים ועל אדום כלא אשר נתנו את ארצי להם למורשה בשמחת כל לבב בשאט נפש למען מגרשה לבז:
(ו) לכן הנבא על אדמת ישראל ואמרת להרים ולגבעות לאפיקים ולגאיות כה אמר אדני ה' הנני בקנאתי ובחמתי דברתי יען כלמת גוים נשאתם:
(ז) לכן כה אמר אדני ה' אני נשאתי את ידי אם לא הגוים אשר לכם מסביב המה כלמתם ישאו:
(ח) ואתם הרי ישראל ענפכם תתנו ופריכם תשאו לעמי ישראל כי קרבו לבוא:
(ט) כי הנני אליכם ופניתי אליכם ונעבדתם ונזרעתם:
(י) והרביתי עליכם אדם כל בית ישראל כלה ונשבו הערים והחרבות תבנינה:
(יא) והרביתי עליכם אדם ובהמה ורבו ופרו והושבתי אתכם כקדמותיכם והטבתי מראשתיכם וידעתם כי אני ה':
(יב) והולכתי עליכם אדם את עמי ישראל וירשוך והיית להם לנחלה ולא תוסף עוד לשכלם: ס
(יג) כה אמר אדני ה' יען אמרים לכם אכלת אדם אתי את ומשכלת גויך גוייך היית:
(יד) לכן אדם לא תאכלי עוד וגויך וגוייך לא תכשלי תשכלי עוד נאם אדני ה':
(טו) ולא אשמיע אליך עוד כלמת הגוים וחרפת עמים לא תשאי עוד וגויך וגוייך לא תכשלי עוד נאם אדני ה': ס
(טז) ויהי דבר ה' אלי לאמר:
(יז) בן אדם בית ישראל ישבים על אדמתם ויטמאו אותה בדרכם ובעלילותם כטמאת הנדה היתה דרכם לפני:
(יח) ואשפך חמתי עליהם על הדם אשר שפכו על הארץ ובגלוליהם טמאוה:
(יט) ואפיץ אתם בגוים ויזרו בארצות כדרכם וכעלילותם שפטתים:
(כ) ויבוא אל הגוים אשר באו שם ויחללו את שם קדשי באמר להם עם ה' אלה ומארצו יצאו:
(כא) ואחמל על שם קדשי אשר חללוהו בית ישראל בגוים אשר באו שמה: ס
(כב) לכן אמר לבית ישראל כה אמר אדני ה' לא למענכם אני עשה בית ישראל כי אם לשם קדשי אשר חללתם בגוים אשר באתם שם:
(כג) וקדשתי את שמי הגדול המחלל בגוים אשר חללתם בתוכם וידעו הגוים כי אני ה' נאם אדני ה' בהקדשי בכם לעיניהם:
(כד) ולקחתי אתכם מן הגוים וקבצתי אתכם מכל הארצות והבאתי אתכם אל אדמתכם:
(כה) וזרקתי עליכם מים טהורים וטהרתם מכל טמאותיכם ומכל גלוליכם אטהר אתכם:
(כו) ונתתי לכם לב חדש ורוח חדשה אתן בקרבכם והסרתי את לב האבן מבשרכם ונתתי לכם לב בשר:
(כז) ואת רוחי אתן בקרבכם ועשיתי את אשר בחקי תלכו ומשפטי תשמרו ועשיתם:
(כח) וישבתם בארץ אשר נתתי לאבתיכם והייתם לי לעם ואנכי אהיה לכם לאלהים:
(כט) והושעתי אתכם מכל טמאותיכם וקראתי אל הדגן והרביתי אתו ולא אתן עליכם רעב:
(ל) והרביתי את פרי העץ ותנובת השדה למען אשר לא תקחו עוד חרפת רעב בגוים:
(לא) וזכרתם את דרכיכם הרעים ומעלליכם אשר לא טובים ונקטתם בפניכם על עונתיכם ועל תועבותיכם:
(לב) לא למענכם אני עשה נאם אדני ה' יודע לכם בושו והכלמו מדרכיכם בית ישראל: ס
(לג) כה אמר אדני ה' ביום טהרי אתכם מכל עונותיכם והושבתי את הערים ונבנו החרבות:
(לד) והארץ הנשמה תעבד תחת אשר היתה שממה לעיני כל עובר:
(לה) ואמרו הארץ הלזו הנשמה היתה כגן עדן והערים החרבות והנשמות והנהרסות בצורות ישבו:
(לו) וידעו הגוים אשר ישארו סביבותיכם כי אני ה' בניתי הנהרסות נטעתי הנשמה אני ה' דברתי ועשיתי: ס
(לז) כה אמר אדני ה' עוד זאת אדרש לבית ישראל לעשות להם ארבה אתם כצאן אדם:
(לח) כצאן קדשים כצאן ירושלם במועדיה כן תהיינה הערים החרבות מלאות צאן אדם וידעו כי אני ה': ס
===פרק לח===
===פרק לח===